精英乒賽搶閘開波

九月雖係開學月份，各支校隊仍在備戰，但全港學界精英乒乓球比賽卻喺九月廿七日搶閘開打！上屆男單冠軍李忠謙，今年衞冕之旅預計尚算輕鬆，皆因「神童」趙頌熙北上集訓而棄賽、去年亞軍鄭楚峰「超齡」、黃鎮廷亦已轉為全職球手……喺眾強退席下，李忠謙已成賽事大熱。

女子組方面，香港學界代表隊隊長毛熙嬋今年離開拔萃女書院，已無法參戰港九區D1賽嘅「毛毛」，相信會全力出戰精英賽，力爭學界后冠。

全港學界 精英乒乓球比賽

27/9、4/10 彩虹道體育館

3/10、10/10 青衣體育館

D1泳賽 睇小仙子

當一眾泳手度過中秋佳節時，記緊唔好食太多月餅而弄壞身體，影響在港九區D1游泳賽嘅表現呀！「聖心小仙子」歐鎧淳自從參戰北京奧運後人氣持續高企，唔少廣告商紛紛搵佢做代言人，不過呢位中五女生始終心繫泳池，現時每日都加緊操練，備戰十月呢個學界體壇最高水平泳賽，全力為校爭光！

港九區校際Division 1游泳賽

22/10、28/10 九龍公園游泳池

越野賽 還看女拔小鐵人

唔好以為十月卅一日係萬聖節，其實真正嘅「西方鬼節」係十一月一日至啱，不過由於現代人都喜歡早一晚慶祝，至有咁嘅誤會！十一月秋高氣爽，除咗係「猛鬼出籠」嘅日子，亦係長跑嘅季節，港九區D1越野賽亦在此時舉行。「女拔小鐵人」許煒森上屆率領校隊重奪失落兩屆嘅團體總冠軍，今年佢哋在陣容上變動不大，絕對有機會衞冕成功。

港九區校際Division 1越野賽

2/11 香港高爾夫球會

精英籃賽崇正捲土重來

崇正中學女籃隊曾於○八年創下學界無人能及嘅「三后冠神話」，但去年聖誕節前夕，卻被協恩中學喺全港精英賽打破其不敗紀錄。到咗今年，精英賽仍係聖誕節假期嘅重頭戲，而崇正主力謝燁琪亦對捲土重來有信心：「我同林嘉芙呢對『港青孖寶』繼續留隊，實力有增無減，相反其他勁旅卻有唔少主力畢業，此消彼長下，我有信心崇正可再創傳奇。」

全港學界 精英籃球比賽

19-23/12 林士德體育館

手球賽聖三一堂誓破咒

一月一日係元旦日，亦象徵新嘅開始！聖公會聖三一堂中學喺○九年手球精英賽四強戰，歷盡艱辛終於擊敗「四屆盟主」中華基督教會譚李麗芬紀念中學，可惜卻在決賽不敵石籬天主教中學，未能破解近年由新界區球隊稱霸嘅魔咒。今屆佢哋雖有兩大主力莊少娟及李麗明離隊，但新一代重心球員姚希欣卻表示球隊早在暑假已開始備戰，絕對有信心捲土重來。

全港學界精英手球比賽

24/1、30/1、31/1 石硤尾公園體育館

6/2 石硤尾公園體育館

7/2 將軍澳體育館

精英足賽董之英發惡

有「學界皇馬」稱號嘅仁濟醫院董之英紀念中學，雖曾於○八年達成稱霸全港四連霸紀錄，可惜上屆不幸喺第一場賽事就輸咗畀香港國際學校，在農曆新年期間慘淡地宣布衞冕失敗。不過，今年董之英除保留田文豪、葛祖威、甄柏朗等主力外，更加入李樹烊、蔡國威及黎子峰等港青成員，實力得到進一步提升，要再次登上學界巔峰應不成問題。

全港學界 精英足球比賽

21/2、28/2、7/3 跑馬地遊樂場

11/3 深水埗運動場

14/3 斧山道運動場

D1田徑賽女拔天下

三月八日婦女節除咗係「女人天下」外，三月舉行嘅港九D1田徑賽更係「女拔天下」！上屆橫掃A、B、C三Grade團體冠軍，達成「Grand Slam」美夢嘅女拔，其主力區樂瑤坦言有信心延續盛世：「其實我哋陣容同去年相若，胡泳彤因重讀中七而繼續留隊，雖然佢同梁巧詩、許文玲等主力今季都要應付公開試，但我堅信『船到橋頭自然直』，屆時一切難題會迎刃而解。」

港九區 校際Division 1田徑賽

3/3、9/3、12/3 灣仔運動場

■圖／文：司徒子文