本文重點
歐聯果然係「英超Big4」福地，分組賽頭輪賽事四戰贏晒，得勝率100%！繼曼聯、車路士日前僅勝對手後，阿仙奴、利物浦昨晨再煲魚生粥，兵工廠贏波險過剃頭，作客標準列治先落後兩粒反勝三比二，扳平一球明顯越位及犯手球在先，取得歐聯第五十場勝仗大話夾好彩。而紅軍主場脆脆地小勝迪比辛一比○，總算贏出歐聯第一百場勝仗。
「英超雙雄」前晚遇「弱」，但入到歐聯分組賽嘅球隊曳極有限，其中兵工廠就幾乎陰溝裏翻船，佢哋喺Ｈ組作客比利時霸主標準列治，共有九名球員包括尹佩斯、艾沙維、艾蒙尼亞受傷唔出得，以超殘陣應戰，頭五分鐘球員騰騰震，竟然先輸兩球。
兵工廠反勝執身彩
阿仙奴如夢初醒，半場前靠賓特拿扳回一城，而到七十八分鐘，桑治接應傳送先越位再犯手球，但球證視若無睹，終由中堅華美倫門前建功扳平。客軍最後憑伊度亞度達施華轟入致勝球，戲劇性反勝對手。領隊雲格表示：「首先落後兩球當然難打，我哋個陣超殘，但最後仍能反勝，的確難能可貴。華美倫真係個出色中堅，佢擁有強大攻擊力。」
另一場Ｅ組賽事，利物浦主場迎戰匈牙利迪比辛，賽前「讓球主客和」讓兩球被插到得1.53倍，但紅軍雖強陣出擊，卻表現平平，僅靠古積特完半場前執雞成功贏一比○，僅力保1.04倍主Ｗ，累死唔少上盤客，賽後主帥賓尼迪斯話最緊要攞晒三分啫。