本文重點
今次火炬傳遞共有65名火炬手，除咗第一棒黃金寶同最後一棒李麗珊，仲有中國國家體操名將李小鵬、香港羽毛球名將周蜜及王晨、泳手蔡曉慧，足球圈就有足球先生李威廉、門將范俊業、盧均宜，以及傳遞期間火炬「死火」要用後備火炬嘅「亨利」鄭少偉。
對於大部分市民都唔知香港即將舉辦東亞運，負責第一棒嘅黃金寶稱：「佢哋唔係唔知，只係香港人好忙碌，為咗生活，所以冇乜理，依家經濟好轉，啲人就會參與多啲體育活動。」
李小鵬有份傳一棒
第二棒嘅蔡曉慧就呼籲市民撲飛睇比賽：「香港東亞運可能係我退役前嘅最後一個運動會，我已經叫晒啲朋友撲飛，希望有多啲人買飛睇比賽啦。」
體操名將李小鵬表示：「有點激動，香港第一次舉辦大型運動會，和京奧一樣，希望市民支持，運動員拿取好成績。」
足球先生李威廉就套用黃興桂金句來形容自己做火炬手：「今次成為火炬手好值得紀念，真係『有今生、冇來世』，我會鑲起支火炬。」
壓軸最後一棒嘅「風之后」李麗珊則說：「距離開幕已進入百日倒數，希望香港運動員好好準備，爭取佳績。」