嚟到馬德里，除咗去巴拿貝，仲有好多地方都可以搵到皇馬蹤迹。大家一定要到豐收女神廣場（Plaza de cibeles）影相留念，因為每逢皇馬取得重要錦標，球迷同球會都會喺呢度慶祝，而去年西班牙勇奪歐洲國家盃冠軍，都係喺呢度狂歡。
此外，喺市中心景點太陽廣場（Puerta del Sol）附近，除咗有馬德里市標誌之外，附近亦有皇馬專賣店，賣嘅嘢同巴拿貝一樣，而且冇咁多人唔使排隊。
而喺太陽廣場五分鐘腳程左右有個叫市長廣場（Plaza Mayor），穿過呢個廣場，去到一條小街，喺一個隱蔽舖位有一間叫Botin嘅餐廳，呢間餐廳就巴閉囉，創業於1725年，被列入《健力士世界紀錄大全》現存最古老嘅餐廳。呢間餐廳設計特別，要走落地底食飯，好似走入防空洞咁樣，最出名嘅菜式係燒乳豬及小羊，最正嘅係，西班牙國王及好多皇馬嘅西班牙球員如魯爾都成日幫襯呢間餐廳，隨時有機會同魯爾隔籬枱食飯！