不經不覺，我擔任大獎賽香港站嘅市務總經理已經第九年，一直以來見證咗前教練胡進到陳忠和嘅金牌團隊，京奧大換血後，中國女排以「蔡家軍」新面貌來港，令球迷耳目一新，而我在短短日子，亦發現呢班小姑娘嘅優厚條件及特長。好似喺尋日記者會受到多明尼加教頭點名讚賞嘅薛明，今年好似開咗竅咁，我睇好佢可成為攻防兼備嘅新女排核心人物。

打波主動有決心

喺今年嘅意大利同瑞士女排賽，薛明表現令我眼前一亮，佢打波主動又有決心，同早兩年後生時相比明顯更有把握性。無論打快、背飛，比以前嘅周蘇紅同劉亞男更好，由於佢嘅竄擾性強，往往拉開對手防守，變相為負責主攻嘅隊友製造更多空位，令戰術更多變。大獎賽澳門站佢嘅攔網贏晒，反映出佢喺防守方面嘅作用好大，佢今年只有廿二歲，我不但睇好佢做趙蕊蕊接班人，將來成就甚至比前輩更高呢！

世界女排大獎賽市務經理國際教練鄭景亮