如果你以為喺香港打欖球，仲係一班粗獷型外籍男士專利嘅話，咁就真係「Out到冇朋友」！隨着近年「香港國際七人欖球賽」掀起「潮」風，除咗令「本地薑」勢力入侵欖壇外，更吸引咗唔少「潮型少女」參與！皆因佢哋覺得打排球冇新意、練瑜伽唔夠激、打保齡冇晒陽光氣息……所以唔少女仔都會揀欖球嚟打！

欖球大使以身作則

HotCha三位型女Crystal、Regen、Winkie凡事都走喺潮流尖端所以就喺今個夏天走入球場，一於「欖、曬上身」！Crystal話：「最初都係玩玩吓，當係Keep Fit，由於運動量高，都幾易修身㗎！又可以曬得健康啲！之後欖球總會就搵咗我哋做宣傳大使，證明HotCha夠活力、夠energy，形象啱晒佢哋！」

Winkie就話做大使除咗同班小朋友玩得好開心之外，仲可以改善自己嘅欖球技術：「做咗大使，就覺得有壓力，因為身為大使打波唔叻唔緊要，但就唔可以用啲錯嘅方法去打，咁樣教壞細路就唔好啦！於是就有動力去逼自己練好啲，改晒之前啲壞習慣，做個好榜樣。」

由細做起 家長埋手

做得欖球界嘅代言人，梗係要幫手「拉客」，令更多青少年參與呢項有益身心嘅運動。平日特別多得意諗頭嘅Regen就諗到一條絕橋：「要推廣運動當然要由細做起，所以我會向家長埋手，話佢哋知欖球好講求紀律同服從性。如果畀班細路打欖球，返屋企一定會變得聽話咗，咁樣啲家長就會帶晒啲仔女嚟學打波啦！」

Regen講欖

由於之前讀書冇乜女同學打欖球，所以覺得呢種運動好特別同好型！但係打落又發覺唔係咁難玩，因為主要都係攞住個波跑同傳球，加埋攔截，就係咁簡單。

Winkie講欖

可能大家都有錯覺，以為打欖球嘅人只識橫衝直撞，係無腦嘅運動。其實打欖球好玩之處在於點樣利用戰術去避開對手攔截及用計謀去防守，都係好用腦㗎！

Crystal講欖

欖球結合咗唔同運動元素同技巧，傳波似籃球、用腳踢嘅時間似足球、控球似打手球……真係做到學一樣運動已經百般武藝在一身！

計分方法Q&A

Q：欖球得分方法究竟點計？

A：如果你成功衝過底線，將個欖球放低「達陣」，就先會有五分。而「達陣」後可獲補加一個定點球，只要將個波踢入「H」形嘅門框之內，就可多得兩分。

另外，喺組織攻勢時，唔去「達陣」都可以直接將個波踢向「H」形門框內得三分，不過就要喺踢之前將個波「滴」一下地，否則就當誤傳出界。

邊度有得學？

香港欖球總會

查詢電話：2504 8311