魚排安全 各適其適

本身係釣魚發燒友嘅胡兆康，好多時都會約埋朋友出海釣魚，皆因佢喜歡既寧靜又富挑戰嘅感覺，今次康仔介紹到榕樹澳嘅魚排釣魚，主要係呢個地方適合不同「程度」嘅人士，康仔話：「魚排比較安全，初學者或者小朋友都好適合，既可以試釣魚排內嘅魚，又可試釣魚排以外即係喺海裏游嚟游去嘅魚，所以有時會有驚喜，釣到石斑都唔奇。如果本身已經係『高手』，就可以Set唔同目標，挑戰一下。」

康仔話近年由於比賽多，釣魚的時間減少好多，這天康仔就難得「偷得浮生」，揸住愛車同兩位保齡球隊友阿Ming及Rickle享受釣魚樂，佢哋帶齊「架生」，不同嘅魚竿、魚餌、魚鈎，諗住釣圍「海鮮宴」，想不到好耐冇「揸」桿嘅康仔，傾吓講吓約半小時就有收穫：「有喇、有喇！好大條烏頭呀！」原來不同季節會釣到不同嘅魚獲，烏頭就係夏季最常見嘅魚種。

假日熱鬧 來回方便

講番榕樹澳，就喺西貢著名景點三杯酒隔籬，原來呢度共有八十多個魚排，特別係假日就相當熱鬧，其中一個魚排負責人鍾先生話：「我哋星期一至日都做生意，大人收八十蚊，細路四十蚊，十人以上嘅團體就有折頭，好多人都會自備魚具，但我哋都可以提供手牌（即魚版）。」釣魚人士只要去到榕樹澳嘅沙灘旁邊，再搭小艇就可以去到魚排任釣，原則上各個魚排在假日已有好多小艇在岸邊Stand by，如果平日要出海到魚排，去到碼頭附近已經有不同魚排嘅廣告牌或聯絡電話，一定唔會「摸門釘」。

圖／文：李芷韻、阿Kin

場地提供：釣魚樂園（Tel:9759 3081）