申：申東燦 記：記者
記：其實香港好多記者都搵你做訪問，但點解呢幾個月以嚟你都拒絕？
申：咁係因為我初嚟步到，對香港嘅籃球文化又唔熟，所以先唔做訪問。而我執教永倫之後，就認為呢隊波一定會贏冠軍，所以遲早都有機會做訪問啦！你睇依家咪係一個好時機囉！
記：諗番起幾個月前永倫喺銀牌決賽輸畀南華，之後你就嚟香港接手執教，嗰陣時你點樣重建番班球員信心？
申：其實班球員打波咁多年，已經有自己嘅本能習慣同埋思想，所以我第一件事就係要幫佢哋洗腦，因為技術改進要花好多時間，但心態上就可以好快搞掂。仲記得我第一課嘅時候就同佢哋講「你哋相信我就可以贏波」！
另外，仲記得初嚟香港，每晚我都幾乎通宵睇番對手南華嘅比賽DVD，了解佢哋長短處，咁先可以知己知彼，百戰百勝！
永倫快攻 三年見功
記：咁喺你執教短短時間，你覺得班球員邊方面轉變最大？
申：佢哋最初覺得打籃球只係為興趣，但我要令班球員知道，佢哋都可以變得好專業！雖然比起韓國職業球隊一日操八個鐘仍然有段距離，但經過一星期有六日都要操嘅磨練下，我開始見到班球員嘅眼有火，重新鍾意番籃球！
記：有唔少人都批評你每場比賽都只係用八個球員去打，咁點解你唔畀李翹峰、程健文同埋翁萬特多啲落場機會呢？係唔係「雪藏」佢哋先？
申：大家千祈唔好誤會，我認為佢哋三個對球隊嚟講係好重要！有次領隊林植昌問我選球隊MVP嘅意見，我就即刻答佢係呢三個，因為佢哋一直默默耕耘。但係真係好抱歉，我喺香港嘅時間實在太短，對佢哋三個嘅了解唔多，所以先畀唔到出場時間。我會用嚟緊一年時間多啲了解佢哋，保證下季全部球員都用得着！
記：大家都知永倫會長許業榮嘅目標係亞洲冠軍球會盃，成為「亞洲第一」，你認為永倫可唔可以做到？
申：雖然香港球員喺身高上好蝕底，但我認為矮有矮嘅打法！永倫只要將佢嘅「Run & Gun（快攻戰術）」發揮至完美，就一定可以！喺我心目中嘅完美快攻係籃球唔落地情況下反擊得手，雖然依家佢哋仍然處於初學階段，但我相信三年內必定可打出完美快攻！
記：有好多傳言都話你會離開永倫，有冇啲咁嘅事先？
申：其實我本身係隸屬南韓籃協嘅技術委員會，所以會有唔少嘅變數！不過，我教永倫絕對唔係為名為利，亦教得好開心，我保證各位下季喺香港一定會再見到我！
More About 申東燦
曾為南韓國家隊代表成員嘅申東燦，球員年代嘅最大成就，當然係1982年贏得亞運會金牌！申東燦退役後就積極投入南韓青訓工作，而佢所帶領嘅景福高中，更喺1995年贏得全國高中賽「三冠王」，威震整個南韓！育有一女嘅申教練，現為南韓籃協嘅技術委員，今次來港執教永倫，純粹因為受朋友拜託，所以絕對唔係如外間所講嘅「重金禮聘」！
國籍：南韓
出生日期：1956年3月20日
年齡：53歲
威水史：
球員—1982年亞運金牌及1978年亞運銀牌（南韓）
教練—1995年全國高中賽三冠王（景福高中）
圖、文：司徒子文、黎永淦