掟波入人堆冧fans

先講「親民」一面，高比為咗令更多香港市民見到佢一面，更經常故意企高一啲，實行三百六十度環迴揮手。「驚喜」方面，高比做咗一樣最令fans興奮嘅事情，就係向球迷堆狂掟簽名籃球，佢先喺尖沙咀商場掟咗十幾個波，喺修頓球場又掟十幾個上看台，搞到現場咿哇鬼叫。

離開修頓之前，高比仔隨意喺看台挑選咗三位舉牌女球迷，向佢哋贈送簽名波，並即場除咗對鞋簽名送畀佢哋，三位女孩表示，會鑲起對鞋留念。

另外，前晚約十二時，高比離開酒店到中環蘭桂坊消遣，同行大批保安築起人牆護駕，高比其後到私人會所Halo玩樂，逗留兩小時離開。

高比仔精力過人，昨晚繼續出動，十一時後前往銅鑼灣富豪酒店消遣，據悉該酒店設有一私人會所。