現身商場谷新鞋

高比仔有一套個人簽名系列嘅球鞋，呢個系列最近出咗新款，因此佢亦親自上陣幫手宣傳，昨午親臨尖沙咀一商場，催谷新鞋銷量。

賣完廣告，高比仔轉移陣地去到灣仔修頓室內場，親自落場教本港學界球員打波，佢仲挑選咗三個資質特佳嘅小將，傳授三項招式，分別係第一招「小天鈎」，第二招fade away「跳後投球」，第三招左搖右擺過人技術。

就讀男拔嘅福建球員劉凱濤，獲高比仔教授「小天鈎」技術，示範點樣低位轉身鈎手，十六歲嘅徐遠成則獲授fade away「跳後投球」，跳起後身體仰後，然後投籃，安青隊員周健宏則獲授左搖右擺過人技術，高比仔示範一組好有節奏嘅帶球動作，身體左右搖晃擺脫對手。三位小將受教後表示自己「開咗竅」，以後會日夕苦練高比所授技術。