本文重點
今年喺甲一籃球聯賽威到盡，連奪常規賽及季後賽「雙料冠軍」嘅永倫，日前喺馬會會所大開勝利Party！成班球星除咗猛咁將龍蝦、生蠔、長腳蟹「倒落口」之外，仲逐一上台講感受，道盡三個月以嚟種種辛酸。會長許業榮更正式宣布，為慶祝球隊創立三十周年，球隊喺未來一年有連串大計！而率先「打頭陣」嘅係「遠征」大嶼山芝麻灣嘅正生書院，教佢哋班學生打波之餘亦幫手興建球場；更會舉辦外隊四角賽，為該院校籌款！
出錢出力做埋義工
近日正生遷校問題成為城中熱話，許生就話睇過有關報道後，對佢哋處境深表同情，並表示希望幫得就幫：「我知道佢哋有班熱愛籃球嘅學生，亦有組織校隊參加學界賽，可惜嘅係該校籃球場設備不足，所以嚟緊暑假我哋會拉大隊入芝麻灣，希望可以指導一吓班校隊成員之外，更會捐出一啲建築材料及籃球架，盡一切能力去提供協助，畀到鼓勵呢班籃球愛好者。」除此之外，許生仲計劃主辦表演賽嚟為正生籌款：「香港球會已有好多年冇搞外隊賽，希望可以借助教練申東燦嘅人脈，邀請一啲南韓大學隊嚟打四角賽，當中梗係包括勁旅延世大學啦！」
對於「遠征」芝麻灣，一班永倫球員當然「舉腳贊成」！身為中學教師嘅中鋒吳華峰更表示：「其實除咗金錢方面之外，我哋最希望嘅係能幫助學生重投社會，如果許生可以發揮佢喺商界嘅影響力，畀到班學生工作或者創業嘅機會就更理想。」