本文重點
其實騎蠻牛只係牛仔競技其中一個比賽項目，不過因為較受歡迎，所以獨立出來變成一個搵錢節目，但不同地方牛仔節，牛仔競技有唔同比賽，包括套索、擒牛、擠奶、騎綿羊及繞木桶賽馬等，十足嘉年華會一樣，啱晒一家大細。
擒牛十足打摔角
在美國及加拿大等國家，牛仔競技主要分為套索及騎術兩部分，套索是牛仔用最短時間捕捉倉皇而逃的牲畜，牛仔要騎在馬上飛索難度甚高。騎術除了騎蠻牛或蠻馬，還包括擒牛（Steer Wrestling），擒牛時牛仔先要策馬接近小牛，再從馬身跳下擒下小牛，將小牛馴服，過程十足打摔角，官能刺激十足。
另外，危險性冇咁高嘅比賽尚有繞木桶賽馬、擠牛奶及騎綿羊，前兩者都係以往西部牛仔工作所需的技能，而騎綿羊就係餘興節目，畀女性或小朋友參加。