已經年屆卅七歲嘅「大鯊魚」奧尼爾，無論球場內外都有價有市，經過一輪討價還價後，騎士終以賓華萊士、柏夫奴域及下季一個次圈選秀權，從太陽換入上季重振雄風嘅奧尼爾，扶助「大帝」勒邦占士圓總冠軍夢！奧尼爾曾經幫高比拜仁及韋迪兩位「波神接班人」奪得冠軍指環，睇怕占士來季亦都大有機會正式「登基」。
其實騎士喺上季轉會窗關閉前，已想羅致奧尼爾扶助「大帝」，可惜太陽當時希望得到薩比亞而非「大賓」，間接令交易告吹。但基於太陽上季未能打入季後賽，首要任務就係送走年薪達到二千一百萬美元嘅奧尼爾，所以寧願放棄下季成績都要騰出薪酬空間重組。
幫過高比韋迪攞冠軍
因此騎士重新向太陽提出以賓華萊士及柏夫奴域作交易，連同下季一個次圈四十六位選秀權及五十萬美元作誘餌，結果一拍即合，太陽願放走呢個効力個半球季嘅星級中鋒，預期交易將於日內完成。
騎士上季獲得常規賽冠軍，但喺東岸決賽中，內線完全輸蝕畀杜域侯活領軍嘅魔術，結果亦被魔術淘汰，難怪騎士痛定思痛，希望奧尼爾可以改善中鋒問題。
雖然奧尼爾已卅七歲，高峰期已過，但佢上季重拾佳態，奪得近三季以來最高平均得分17.8分，若然來季能夠保持狀態，肯定可以令騎士進一步壯大。此外，奧尼爾甚有總冠軍緣分，多年來先後與高比拜仁及韋迪合拍奪得冠軍指環，來季拍住如日方中嘅「大帝」，奪冠機會相當濃厚。
More About Shaquille O'Neal
位置：中鋒 國籍：美國
出生日期： 1972年3月6日
身高： 7呎1吋
曾効力球隊：魔術、湖人、熱火、太陽
個人榮譽
四屆總冠軍 （00、01、02、06年）
常規賽MVP （00年）
總決賽MVP （00、01、02年）
最佳新秀 （93年）
神射手 （95、00年）
明星賽MVP （00、04、09）
起跌表
93-96年 首季獲選為最佳新秀，第三季已打入總決賽
96-99年 「天價」改投湖人，但頭三季都未能打入總決賽
99-02年 替湖人取得三連霸，三奪總決賽MVP及一次常規賽MVP，登上事業高峰
02-04年 與高比拜仁不和，並於04年改投熱火
04-06年 06年助熱火奪得總冠軍，取得個人第四隻冠軍指環
06-08年 飽受傷患困擾，並於08年改投太陽
08-09年 未能助太陽打入季後賽，最終改投騎士