金融海嘯嘅衝擊確實厲害，美國經濟衰退，洛杉磯市唔想出現預算赤字，正準備「炒」一班市政工人，所以一班市政廳人士就認為要花過百萬美元嚟慶祝就好反感。反對遊行嘅市議員佩妮話，依家政府正為市民搞緊就業問題，點解仲要贊助勝利遊行，佢仲反問點解湖人或者NBA唔可以畀呢筆費用。

高比發表效忠宣言

其實，呢幾年洛杉磯市議會都喺降低搞活動嘅規模及費用上作出爭議，最新議案會喺今周有最後表決，但可能湖人都已經捧走總冠軍。洛杉磯市預算及財政委員會負責人就話，如果搞遊行，呢筆費用應該由政府畀錢，事關呢啲活動真係好多年先有一次。

湖人上一次捧走總冠軍，已經係七年前嘅事，當年洛杉磯用一百一十萬美元做巡遊，當中包括警察、交通部及清理工作人員等。阿Bob認為完全冇慶祝活動對班球員嚟講真係好hurt，可唔可以諗個兩全其美嘅方法呢！

另外，「小飛俠」高比拜仁尋日就表明唔會離開効力咗十二年嘅湖人，有人問佢係咪想好似米高佐敦咁攞足六隻冠軍指環，高比就話：「首先等我攞到第四隻先講啦。」