本文重點
【本報綜合報道】NBA史上曾經有八支球隊可以落後一比三下反勝，可惜呢八次大逆轉，未曾喺總決賽出現，根據往績顯示，湖人可謂百分百奪得總冠軍！亦因為咁，湖人上場擊敗魔術後，有二千名球迷當晚率先走上洛杉磯街頭慶祝，仲差啲爆發騷亂添。
據《美國體育在線》報道，湖人領先魔術三比一後，該隊球迷已認定愛隊可以捧走第十五個總冠軍，所以約二千名球迷當晚走上大街大事叫喊慶祝，更有激進球迷搖晃汽車及爬上車頂呼喊，最終洛杉磯警方要出動大批警力，先可以平息呢班球迷，阻止騷亂發生。
總決賽數據利湖人
其實冠軍獎盃都仲未到手，球迷又使乜咁快慶祝呢，不過NBA總決賽曾出現過廿九次四戰過後打成三比一，結果領先球隊全部贏得冠軍指環，湖人可謂登基在望。另方面，據ABC電視台統計，今季總決賽第四戰收視人數達到一千六百萬，較去年總決賽第四回合提高16%，成為○四年後，最高收視嘅總決賽第四戰。