整個季後賽都表現低沉嘅湖人老將費沙，尋日用兩個三分球充當救世主，挽回所有聲譽！費沙先於第四節尾段射入三分帶領湖人殺入加時，到加時後再射入一記關鍵三分令魔術翻身無望，最終湖人贏99比91，總成績領先到三比一，只要下周一早上再贏一仗，就可以提前奪冠。

縱然今場已成為「費沙時刻」，但其實魔術輸波原因，歸根究柢都係毀於自己手上。先講第四節，賽事剩餘11秒，魔術領先三分兼有杜域侯活博得犯規可以拉開五分優勢，可惜「超人」今場喺罰球線毫無信心，如此關鍵時刻竟然兩罰不中，費沙隨即喺尼爾遜面前射入一記三分追成87平手，魔術白白斷送贏波絕佳機會。

高比拜仁（左）同魔術嘅哥特尼李爾埋身肉搏。 （美聯社圖片）

放大圖片

杜域侯活罰球冇準成罪人

去到加時，湖人主將高比拜仁多番投射失靈，但魔術眾將一而再痛失領先機會，終在完場前31秒被費沙再次射入三分領先94比91，及後魔術部署混亂，最終被湖人拋開分數贏99比91，總成績領先三比一下，奪冠機會高唱入雲。雖然杜域侯活今場繼續打出驚人防守數據16分、21個籃板球及９次封阻，但佢罰球14射６中，絕對係輸波主因。另方面，尼爾遜兩度被費沙輕鬆射入關鍵球，亦屬輸波罪人。

救世主費沙賽後表示，能夠兩度射入關鍵波，全因自己信心十足，加上第一球尼爾遜畀佢好多空位，令佢射得輕鬆。高比拜仁今場射入32分，今季季後賽總分已達到665分，打破個人季後賽得分新高，不過高比仔今場命中率頗差，31射僅得11中，表現唔算太好。