本文重點
湖人喺NBA總決賽又以快打慢對付魔術，憑高比拜仁攻入四十分，加上拜林、奧當同加素多次夾擊「超人」杜域侯活成功，湖人最終以100比75大炒魔術，喺七場四勝制嘅總決賽領先一場。
其實賽前好多分析，都話湖人教練積遜會用拜林、奧當同加素輪流夾擊杜域侯活，魔術教練雲根迪又點會算唔到呢一着，所以佢都加強外圍實力，亮出「秘密武器」，養傷多時嘅尼爾遜後備復出，希望可以拉近雙方得分能力。
杜域侯活受制雙人夾擊
不過，人算不如天算，雲根迪算到唔同湖人鬥內線，可惜外線班球員起手唔順，球隊靈魂人物杜域侯活又爆唔開湖人嘅雙人夾擊，只摘下十五個籃板球及射入十二分。
高比仔就生猛得多，全場轟入四十分，係個人首次喺總決賽射入四十分，並貢獻八個助攻及八個籃板球，湖人早早領先，第四節已係垃圾時間，但高比仔賽後不以為然：「我哋要做嘅係盡快忘記呢場勝利，準備第二回合賽事。」