本文重點
阿Bob幾時都話：「牡丹雖好，都要有綠葉扶持。」丹佛金塊昨日就深深感受呢個道理，由於「甜瓜」安東尼患重感冒後大失水準，喺西岸決賽第四回合對洛杉磯湖人僅得十五分進帳，幸好其他隊友表現神勇，幫助金塊主場以120比101擊敗湖人，總比數扳成二比二。而安東尼揚言休息兩晚後，聽朝作客對湖人會有更佳發揮，阿Bob就拭目以待睇佢係咪真係咁醒。（無綫明珠台及now 670周四早上9時直播）
安東尼首三回合都係金塊得分主力，平均每場攞超過31分，但早前因重感冒吊鹽水，加上比賽初段拗柴，令佢今仗命中率奇低，16投僅3中，幸好「Mr Big Shot」比立斯遠距離跳射頻頻建功，個人獨取24分，而「鳥人」基斯安達臣搶咗14個籃板，加上多次美妙封阻，亦係贏波功臣。
高比仔攞34分都要輸
今場獨取34分嘅高比拜仁，大讚「鳥人」厲害：「金塊今場控制晒籃板球，係贏波嘅關鍵，尤其係『鳥人』充滿活力，為球隊注入咗動力。我哋係一支年輕嘅球隊，當領先二比一嘅時候，可能有所鬆懈，但我好有信心返到主場可擊敗金塊，再度領先。」
金塊今仗共有三人籃板球數字喺13個以上，阿Bob知道係近15年來季後賽嘅紀錄，不過15年前嗰場波打咗兩次加時，故金塊今次所創嘅紀錄更加厲害，湖人聽日想贏波，就要搶好啲籃板球喇。