本文重點
僅休息一日嘅洛杉磯湖人，尋日又要披甲上陣展開西岸決賽，雖然湖人喺首戰大部分時間落後，但球隊勝在有高比拜仁坐鎮，佢個人轟入40分，協助球隊以105比103險勝金塊，總成績領先一比○。
安東尼入39分無補於事
以逸待勞嘅金塊，足足較湖人多四日休息時間，難怪客隊開賽後一直控制大局，首節結束後已領先31比23，由第三節尾段直至比賽剩餘最後兩分鐘，金塊一直處於領先狀態，可惜及後有安東尼卡達一次嚴重失誤被阿利沙搶截成功，而高比仔最後六個罰球亦全部命中，結果湖人險勝105比103，幸保主場勝仗。
今場表現最Sharp繼續係高比拜仁，佢個人轟入40分並搶得6個籃板球，係贏波頭號功臣，而拍檔加素則交出13分及14個籃板球「雙雙」成績。客隊則以安東尼表現最佳，超高命中率20射14中，個人奪得39分，奈何金塊最終都係輸波。第二戰將於明早舉行，湖人續於主場出擊，球迷萬勿錯過。（now 670周五早上9時直播）
快艇抽中狀元籤
另一方面，今季選秀權抽籤已經完成，常規賽成績最差嘅帝王竟然抽唔中頭三個選秀權排第四，代表抽籤嘅韋伯真係要打pat pat。快艇就成為大贏家，巴朗戴維斯代表抽中狀元籤，據悉球隊已選定俄克拉何馬大學主將格芬，而第二及第三選秀權則分別落於灰熊及雷霆身上。