真係一波未平一波又起，魯域斯基個「飛賊」未婚妻泰萊自從被捕之後，「基哥」一心諗住斬情絲，當冇識過呢個壞事做盡嘅衰女人。但勢估唔到，泰萊喺達拉斯獄中竟然驗出懷孕，ＢＢ老竇正是魯域斯基，已決定取消婚約嘅「基哥」睇怕又要度過係咪要仔唔要乸。
話說泰萊喺獄中接受尿液測試時，竟然兩次都確認有咗，於是乎佢就向《達拉斯早報》爆料，希望魯域斯基肯「認頭」。
望基哥回心轉意
泰萊表示：「我識咗『基哥』七年，我唔同佢講我嘅過去，係驚佢會因此而離開我，但我已經同佢住埋咗年半，依家我有咗佢骨肉，實在好需要佢經濟上嘅支持。另外我亦要反駁一點，就係我從來冇做過妓女！」