東岸決賽首戰聽朝爆發，克利夫蘭騎士主場迎戰奧蘭多魔術，唔少人都認為今場係常規賽ＭＶＰ勒邦占士同最佳防守球員杜域侯活正面交鋒，事實上二人亦敵亦友，大家同屬美國「夢八」隊成員，而且都係後生可畏。不過，阿Bob認為打波唔係打一個人，兩軍綠葉亦好重要，加上騎士無敵主場出擊同埋多咗成個禮拜休息，相信騎士可於七場四勝制嘅決賽中先下一城。（周四早上８時30分開賽）
杜域侯活同勒邦占士今季喺常規賽鬥到難分難解，結果勒邦占士憑住全能嘅表現勇奪ＭＶＰ，至於杜域侯活則靠恐怖嘅防守數據奪得最佳防守球員，勢估唔到兩人去到季後賽，多項數據都有所提升，占士每場平均得分上升到32.9分；杜域侯活嘅籃板球更加提升到16.6個，究竟邊個可以喺聽日嘅首回合揚威？阿Bob覺得真係好睇兩隊臨場發揮！
兩軍「綠葉」有睇頭
兩隊都有極佳「綠葉」輔助主角，騎士中鋒賓華萊士決賽經驗豐富，仲有莫威廉士同伊高斯卡斯等無名英雄；至於魔術射手陶告魯喺對波士頓塞爾特人嘅驚人大爆發亦唔可以睇小。
不過，由於騎士上輪一早以四比○橫掃亞特蘭大鷹隊，相反魔術卻要打足七場先淘汰波士頓塞爾特人，騎士足足比魔術多一個禮拜休息，可以話已經抖到夠，加上今季連同季後賽在內四十五場主場賽事贏咗四十三場，咁恐怖嘅數據，阿Bob相信騎士今場可以先下一城。
兩軍近三次對賽成績
05/03/09 魔術 116:87 騎士
18/03/09 騎士 97:93 魔術
30/01/09 魔術 99:88 騎士