本文重點
【本報綜合報道】騎士喺今屆季後賽狀態大勇，連續以四比○橫掃活塞同鷹隊，好多人都認為同勒邦占士大勇有關，但有美國媒體最近爆料，指騎士幕後有一名總統奧巴馬嘅智囊分析數據，幫佢哋Change，難怪奧巴馬都睇好騎士會攞到總冠軍。
參考數據交易球員
據美國傳媒報道，原來騎士今季新增一位數據統計分析師，叫做丹羅森鮑姆，呢位仁兄目前身兼三職，最為人注目係美國預算同管理辦公室嘅高級顧問，主要工作係幫奧巴馬諗計應付當前經濟形勢，而另一個post就係騎士嘅高級統計分析師。
丹羅森鮑姆本身亦係一名籃球迷，好鍾意喺空閒時間用一啲特殊嘅數據去分析球員嘅表現，然後寫喺blog度，騎士嘅總經理丹尼費里就係睇咗丹羅森鮑姆嘅blog後，拿拿臨請佢擔任球隊分析顧問。丹羅森鮑姆開發咗一個調整後嘅場上影響值，即係依家NBA官方技術統計嘅場上加減值，統計該球員喺上陣後，對所屬球隊影響，不過佢仲考慮埋場上其他隊友嘅表現及對手情況。
事實上，騎士今季多宗交易都參考咗丹羅森鮑姆嘅分析，例如賓華萊士仍然係對比賽影響最大嘅中鋒之一；後衞韋斯就係最被嚴重低估嘅球員，結果，佢哋都成為勒邦占士嘅得力助手，難怪總統奧巴馬日前貼騎士會喺總決賽擊敗湖人取得總冠軍，唔知大家又點睇呢？