湖人勢拆火箭

雖然火箭已經追成三比三，闖入西岸決賽近在咫尺，不過阿Bob一向相信陰謀論，認為火箭之所以追平，只係催谷收視嘅一種把戲，論實力火箭根本唔及湖人，更何況全世界都等緊「占士Vs高比」呢個Matchup，生死戰又點容許火箭再過一關呢！（有線165台及廣東體育周一凌晨3時30分直播）

兩軍第六戰一役，創下ESPN有史以來嘅NBA賽事收視紀錄，合共有735萬名電視觀眾，超越○六年東岸決賽熱火對活塞第六戰嘅660萬。賽事愈緊湊，自然愈多人關注，呢個係人所共知嘅定律，所以湖人放水，有乜咁出奇？

高比去波 「雙堤」頂唔住

點秤都好，冇咗姚明嘅火箭，實在難有支持嘅理由，單睇第五戰加素面對六呎九吋嘅史高拉，表現如入無人之境，以火箭嘅「冇中鋒」陣，點頂！更何況高比拜仁要去波嘅話，就算阿堤斯及柏堤亞頂得住都會犯規纍纍，所以湖人實在冇輸波理由，讓12.5分都要照捧上盤。再者，相信冇人比NBA更想見到總決賽係騎士對湖人，球證喺洛杉磯主場會吹成點？自己諗吓啦。