本文重點
【本報綜合報道】小牛出局，難免會令人聯想主將魯域斯基受女友泰萊被捕而影響表現，最近多方面繼續狂插呢位「女飛賊」，前NFL（美式足球）球員東尼賓士日前爆料，話自己多年前曾與泰萊交往，更差啲畀佢搞到雞毛鴨血，所以奉勸魯域斯基要帶眼識人。
已經退休嘅東尼賓士曾征戰NFL九個年頭，佢話九七年經朋友介紹認識泰萊，但呢位「女飛賊」當時卻用假名叫自己做Theresa，非常陰險。當時泰萊主動約會賓士，賓士覺得佢幾靚女，所以就應邀赴約，但熟稔後覺得佢個人好有問題，就連賓士經理人等都認為佢不懷好意，從中搵着數居多，而賓士亦差啲因為「色」字毀掉自己事業。
德報爆曾當妓女
此外，魯域斯基家鄉德國媒體《圖片報》亦搵出重要資料，話泰萊除咗係「飛賊」之外，仲曾於色情場所做妓女。呢間夜店嘅內部職員表示，泰萊當時曾用過化名去取得性交易營業執照，而且年齡報細數，希望吸引客人嘅歡心。