本文重點
火箭靠一眾「二打六」升空！尋日NBA西岸次圈賽事，火箭喺缺少姚明、麥基迪及莫湯保三大猛將下，憑一眾綠葉球員打出代表作，主場痛擊西岸「一哥」湖人99比87。「小黑豆」布魯克斯攻入34分，助火箭贏波追成總比數二比二，光芒盡蓋天王巨星高比拜仁。
小黑豆柏堤亞頻入三分波
當所有人以為火箭冇咗姚明，一定唔係湖人對手之際，火箭卻喺主場大打爭氣波，即使冇咗三位身價四千萬美元（約三億一千萬港元）嘅球星，依然憑將士用命擊敗湖人，火箭喺第三節已領先29分之多，第四節放軟手腳，先畀湖人追近不致大敗。高比仔今仗表現低沉，只得15分，係季後賽三年來新低。
火箭今場贏波功臣係首季打NBA嘅「小黑豆」布魯克斯，佢今仗三分球九投四中，得34分創下個人季後賽新高，前鋒柏堤亞亦入咗五球三分波，靠三分波「射死」湖人。柏堤亞表示：「內線冇咗姚明呢個高佬，我哋惟有瘋狂射三分波，事實證明呢個戰術奏效。」
火箭明早作客湖人前收到好消息，湖人「第六人」奧當上仗勇戰背部受傷，未必可以趕及披甲，湖人冇咗呢位全能戰士，兵源調動有一定影響。