本文重點
火箭第三節嚴重失準，成為第三戰嘅勝負關鍵，湖人最終輕勝108比94，輕易抵銷首戰主場失利嘅局面，總成績反先二比一。輸波嘅火箭更付出沉重代價，中鋒姚明尾段扭傷左腳，一拐一拐離場，明日凌晨一戰或會缺陣，若然屬實，火箭要追平將難過登天。
姚明扭傷腳好濕滯
兩軍合演一場高質素嘅上半場賽事，湖人領袖高比仔早早入局，上半場已攻入14分之多，而「主人家」姚明亦因多番博得罰球機會，完半場後同有14分進帳。兩節過後火箭僅落後兩分，但第三節就表現大跌Watt，遠射命中率奇低之下，被湖人拉開十二分距離，雖然火箭末節一度追至六分之差，可惜湖人保持高企命中率，加上火箭前鋒阿堤斯完場前侵犯湖人中鋒加素，被球證以二級惡意犯規直接罰離場，最終湖人將分數愈拉愈遠，以108比94獲勝，總成績亦反先二比一。
今場最令人擔心係姚明，「小巨人」完場前扭傷左腳，一拐一拐地傷出離場，姚明賽後表示扭傷左腳腕第二節，休息後要接受跑步測試，先知道可否喺第四戰比賽。今場高比拜仁射入全場最高33分，其中三分球6射4中，命中率奇高。至於阿堤斯雖然尾段被逐，但亦有25分進帳，屬全隊最高，姚明則貢獻「雙雙」19分及14個籃板球。聽日凌晨火箭將繼續於主場出戰，不過湖人首戰失利後，近兩仗都打得非常肉緊，相信火箭擁主場之利都好難偷雞。（廣東體育周一凌晨3時30分直播）