「神奇小子」蘇樺偉
我會約埋阿姨同堂妹一齊同媽咪食日本嘢，因為媽咪鍾意食，其實我都好鍾意㗎！禮物方面一早已經諗定，媽咪早排已經睇中一件風褸，難得見到心頭好，梗係要買啦。
「風之子」陳敬然
由於呢兩日要比賽，所以已經提早與媽媽及岳母慶祝，其實早幾年自己有時出外比賽真係唔記得，好彩老婆都會提我，原則上每年我都會同媽咪慶祝，除咗沙士嗰年被迫困喺歐洲。講到禮物，細個都會整張卡，但依家「折現」好啲，佢又鍾意旅行，咪當請佢去旅行囉！
「背泳天后」蔡曉慧
屈指一算，我已經六年冇同媽媽過母親節，事關過去一直喺美國讀書同練水，母親節就只係打個電話畀佢。佢今日下晝會同爹哋去完旅行返嚟，我會去接機，夜晚約埋婆婆食飯。送花？好似老套啲喎，我諗住買部NDS送畀佢，因為佢最近迷上打電話遊戲，等佢可以揸住部遊戲機打到夠吧。
「南拳女王」曾思敏
今年母親節對我嚟講係一個好特別日子，因為舊年母親節我做咗媽媽，眨吓眼囡囡穎心一歲大喇，聽日就一歲生日，所以今日會喺麥當勞同佢搞個生日Party，當然會請埋佢嫲嫲同婆婆出席，總之係阿媽級嘅親戚好友都會參與。