本文重點
「世上只有媽媽好」這句話，連三歲的小孩都識講，早前「黑妹」因為過度緊張比賽，造成壓力，身體極度消瘦，本身有肩周炎的葉媽媽連月來工作之餘，不斷烹調冰糖燉燕窩、人參、冬蟲草，成功谷肥愛女，令幾個月前面無四両肉的「黑妹」，變為「包包面」。
提起「黑妹」早前一度消瘦，葉媽媽坦言當時極為擔心，找尋名醫、專家診治，發覺原來是壓力太大，過度緊張，除了家人的開解外，「黑妹」亦飲增肥奶粉幫助增磅，但當然葉媽媽的「阿媽燉品」才是最大功勞：「當時佢每日都食燉燕窩，加埋一啲湯水，希望將最有營養嘅嘢畀佢食，依家見佢肥番啲，先至放心。」
兩次失女嚇餐飽
不過，講起「黑妹」嘅難忘事，葉媽媽話當年在旺角遺失「黑妹」一幕，現在仍然驚到心跳加速：「當時佢只係一歲半，未太識得行，我哋喺旺角舖頭，轉個頭就唔見咗佢，立即Call警衞封住條街，最後搵咗半個鐘，原來佢自己走咗上二樓！又有一次行街喺商場唔見咗佢，佢原來走咗入去茶樓，仲要坐喺張櫈度，真係畀佢嚇死。」「黑妹」話這些故事都完全無記憶，現在只當笑話聽。