本文重點
【本報綜合報道】貴為NBA新任MVP，試問有邊隊唔想得到「大帝」加盟！一直盛傳紐約人及籃網等球隊，已作好全面準備，喺二○一○年搶簽自由身嘅勒邦占士，但「大帝」日前接受ESPN訪問時，已開腔表態無意離開騎士，令紐約人「奪帝」大計頓成泡影。
2010年自由身好搶手
天之驕子勒邦占士於二○一○年就會成為非限制自由身球員，屆時可自由選擇加盟任何球隊。亦因為咁，紐約人今季已為迎接占士作好準備，先後放走多名高薪球員如馬貝利、蘭度夫及哥羅福等，就算放棄兩季成績都要簽得占士。可惜因為騎士成績躍進，除今季成為常規賽一哥，占士亦攞到夢寐以求嘅MVP獎座，所以日前接受ESPN訪問時，「大帝」就話：「我喜歡騎士這支球隊不斷進步，所以若外界認為我會離隊，實在大錯特錯。」
不過，「大帝」曾豪言要累積十億美元身家，若要實現宏願，必須要增加個人商業價值，例如轉會紐約人，先可以令佢得到更多關注。所以「大帝」一日未續約，紐約人都唔使咁快灰心嘅。