每年NBA都會頒發常規賽最有價值球員，即係MVP（Most Valuable Player），日前勒邦占士亦首度「登基」獲此殊榮。咁大家又知唔知咩係LVP呢？美國傳媒RealClearSports剛選出今季NBA 10大LVP（Least Valuable Player），即係最冇價值球員，呢班仁兄人工高但冇貨賣，名副其實係蛀米大蟲，結果蛀米之王就由76人嘅白蘭特當選。
點解白蘭特咁把炮勇奪今季LVP寶座？因為佢一次過摧毀咗三支NBA球隊！白蘭特季前突然提早結束同快艇嘅最後一年合同，為攞高薪加盟76人，而快艇為咗補充實力，就用騰出嘅薪酬從勇士羅致咗巴朗戴維斯，結果快艇同勇士今季都「領晒嘢」，成績大倒退！至於76人，上半季表現極之差勁，但自從白蘭特因傷收咧後，76人反而愈打愈好，足證呢條友係正宗陀衰家！
當選第二位蛀米大蟲嘅馬貝利就係大熱㗎啦，佢年薪超過二千萬美元，屬於NBA天王級數，但今季直至二月前，佢都未替紐約人上陣過一秒鐘，汗都未出過就係咁收錢，真真廢人也。馬貝利其後過檔塞爾特人，諗住都可以重振聲威啦，點知廿三場常規賽，平均得嗰3.9分，表現同薪金好唔相稱。
至於排第三嘅就係火箭「玻璃人」T-Mac麥基迪，T-Mac年薪都超過二千萬美元，但最弊佢抖多過打，今季更一度實施抖一場、打一場嘅「老人政策」，可惜最終都係因膝傷提早收咧，又試白
人工。不過自從T-Mac收咧後，火箭竟然愈打愈好，季後賽仲十二年來首度突破首圈賽事添，睇嚟T-Mac好番都變得可有可無啦。
AI慘變新一代毒瘤
曾經攞過常規賽MVP嘅AI艾佛遜就排第四，AI自從離開費城後都冇好過，喺金塊同安東尼唔夾，今季過檔活塞後就搞到後者成績一落千丈，僅僅保住個季後賽席位而已。最樣衰係金塊換走AI之後，竟然大躍進榮升為常規賽西岸二哥，可見今時今日嘅艾佛遜，「答案」變成新一代NBA毒瘤！