上期《美麗有序》出街後，好多朋友都話好surprise！佢哋冇諗過Kittak會留意足球，仲話以為我連越位都唔知係乜添！其實足球我OK㗎，最鍾意睇英超，係利物浦fans！想當年我全部紅軍嘅比賽都睇晒㗎，就算第日要返學都係咁話！前年紅軍嚟香港比賽（好似對南華，唔係好記得，嘿嘿），我都有去捧場！
奧雲走咗補番費托
鍾意紅軍係覺得佢哋實而不華，唔會好似曼聯咁high profile（紅魔fans唔好嬲我呀），不過最重要係因為我鍾意奧雲，佢實在太靚仔喇，雖然佢走咗好耐，但都仲有謝拉特同超靚仔嘅「王子」費蘭度托利斯頂住，仍然無損我對紅軍嘅忠心！
紅軍前排喺歐聯畀車路士踢咗出局，真係傷透Kittak個心呀（>.<），惟有寄望聯賽啦，但聯賽依家又落後緊紅魔三分，仲要踢多一場，又只剩番三、四場賽事喎，情況唔係咁樂觀……
其實Kittak幾滿意紅軍今季進取嘅踢法，唔似以前咁保守！三月中紅軍就試過4比0贏皇馬、4比1贏紅魔，最近歐聯對車仔同聯賽對阿仙奴都係4比4，全部係大比數交易，全部都好好睇，完全做到我哋成日講嘅進攻足球。我好欣賞，所以真係好想紅軍champ！
紅魔仲有場聯賽對阿仙奴，又要兼顧歐聯，所以依家又係我哋紅軍fans運用念力嘅時候喇！
Kittak
中學時代被譽為「學界首席沙排明星」，奪獎無數，到入咗城大應用社會學系後更積極參與運動，並擔任NIKE Girl作網上主持人，深受網友歡迎