本文重點
新任ＭＶＰ果然並非浪得虛名！首次孭起ＭＶＰ名銜出賽嘅「大帝」勒邦占士，次圈開局即向鷹隊施下馬威，個人轟入34分，結果休息超過一星期嘅騎士輕鬆以99比72擊敗鷹隊，總成績領先一比○。
大帝轟34分
繼前日喺母校聖瑪麗高中領獎後，占士尋日返回克利夫蘭主場，再從ＮＢＡ總裁史端手上攞起ＭＶＰ獎座與球迷分享榮耀，但佢興奮過後就立即專心比賽，並喺首節已向鷹隊施壓，剷籃、射三分乜都出齊，首節助騎士領先 25比21，而「大帝」首節亦已取得16分。
完結上半場後，騎士僅領先５分，但一到第三節，鷹隊就全面崩潰。結果騎士三節過後領先77比61，拉開15分距離，而「大帝」三節後亦攻入34分之多。因分數已有一定距離，騎士教頭米克布朗末節大部分時間收起占士，騎士最終以99比72贏得次圈首場比賽。
僅上場34分鐘嘅占士奪得全場最高嘅34分、10個籃板球及４次偷波，聽朝騎士續於主場出戰鷹隊，因騎士今季嘅主場得勝率高達九成半，鷹隊要作客偷雞實在非常困難，主隊上盤要捧。
（now 671周五早上８時直播）