本文重點
金塊過關！季後賽第五回合，丹佛金塊憑安東尼攻入34分，於主場再炒黃蜂一次，以107比86大勝對手，總成績四比一進身季後賽次圈。金塊對上一次打入次圈，已經要追溯到九四年球季，事隔十五年後再度晉級，難怪全場球迷賽後都為球隊站立喝采！
上場被金塊盡情羞辱嘅黃蜂，知恥近乎勇下今回明顯打得較為集中，縱然受作客環境影響，但上半場仍咬住主隊唔放，半場後兩軍打成49平手。不過黃蜂第三節就現形，金塊射手比立斯及JR史密夫連番射入三分，率金塊打出一段15比０攻勢，結果第三節領先黃蜂80比66。
安東尼轟34分
金塊最後一節愈戰愈勇，最終以107比86大勝黃蜂，避免連續六年季後賽首圈出局嘅厄運。今場安東尼攻入全場最高嘅34分，並有６個籃板及４個偷波，至於第六人JR史密夫繼續着火，三分球８射５中，全場貢獻20分。金塊晉級後，對手將會係西岸六號種子小牛，近績上一定佔盡優勢，皆因兩軍今季四次對賽中，金塊全部贏晒，球員肯定大有信心。