本文重點
「閃電俠」又再發火！返到邁阿密主場嘅熱火，尋日憑藉韋迪着火表現，個人攻入29分、拉下7個籃板球及有8次助攻，更厲害造出個人季後賽新高4次封阻，結果協助球隊以107比78大勝鷹隊，總成績領先二比一。現時韋迪狀態大勇，鷹隊對住佢都冇晒符，聽朝熱火再喺主場撲擊對手，「閃電俠」肯定再度光速捉鷹！（有線165台及體育台62周二早上8時直播）
為咗力撐今季爆發嘅韋迪，熱火球迷尋日都着上印有紀念韋迪新秀賽季嘅黑色tee入場，形成一片「黑色勢力」！結果韋迪亦冇令主場球迷失望，一開賽就領軍強攻鷹隊，開局一度領先18比4，及後於第二節又曾打出一段12比0攻勢，上半場完結後，熱火已大幅領先50比29。
經過小休後，鷹隊下半場仍未見好轉，最後熱火輕鬆大勝107比78，總成績領先二比一。韋迪繼續銳不可當，全場射入4個三分波，個人攻入29分之餘，更有7個籃板球、8助攻及4封阻，表現相當全面！此外，熱火五位正選球員都攞到雙位數字得分，其中謝美奧尼爾貢獻22分及10個籃板球，狀態同樣高昂。
鷹隊守唔住韋迪
經過三場賽事後，鷹隊似乎仲未搵到箝制韋迪嘅方法，尤其係祖莊遜防守一般，所以經常放生咗韋迪。雖然鷹隊教練活臣不時改用爛打嘅朗奴梅利盯實韋迪，但效果唔好得去邊，基於控衞碧比同樣動作緩慢，「閃電俠」遇上呢個matchup真係特別醒神！兩軍聽朝再度碰頭，熱火眾將已經上晒力，冇理由唔趁主場攞「鷹命」，熱火小讓4.5分嘅情況下，上盤絕對捧得過。