本文重點
【本報綜合報道】每當高比拜仁表現低迷，一定係爆發嘅先兆！高比仔上場作客鹽湖城交出極爛嘅投射命中率，結果尋日即告回勇，一反今季季後賽常態，開賽後起勢要波進攻，結果佢全場24射16中轟入38分，協助「紫黃兵團」以108比94擊敗爵士，總成績領先三比一！而高比仔亦成功超越名將奧拉祖雲，升上季後賽得分榜第七位。
登季後賽得分第7位
縱然爵士主場威力強勁，又有中鋒奧古復出，但似乎都冇乜作用。今場高比仔知恥近乎勇，一開賽就積極進攻，結果呢位上季常規賽MVP首節已8射6中攻入13分，顯示狀態一啲都冇下滑。因高比手感極佳，今場變相唔剷籃，大多於罰球線附近起手跳投，結果高比全場轟入38分及6個籃板球，而佢個人季後賽總得分亦達到3,792分，成功超越奧拉祖雲及塞爾特人名宿夏利斯域，升上歷來季後賽得分榜第七位。
高比賽後表示：「球隊需要我站出來，我嘅爆發可以喚醒隊友，令佢哋更有信心，現時球隊已振作起來！」湖人贏波後，總成績已領先三比一，因爵士只係靠主場搵食，連主場都失守之下，出線機會已非常渺茫。湖人聽朝主場迎戰爵士，大有機會贏波出線西岸四強。（廣東體育周二早上10時30分直播）