本文重點
近季多次作出換血嘅熱火，相信冇乜人預計到今季有好成績，皆因季中先到埗嘅謝美奧尼爾一直被視為「高薪低能」球員，再加上佢受傷患纏身，難免被稱為蝕本貨。但「Ｊ奧」季尾愈打愈有，與年薪僅得七十萬美元嘅查馬斯齊齊成為韋迪「左右手」，威力唔講得笑。
沉寂多年嘅謝美奧尼爾，自季中加盟熱火後宣告重生，亦因為佢經驗豐富，打季後賽自然大派用場。雖然好多人稱佢為「小奧尼爾」，但其實「Ｊ奧」已經「三字頭」，喺ＮＢＡ亦已打滾十二季。正當所有人睇死佢嘅時候，「Ｊ奧」竟然同韋迪擦出火花，雖然常規賽平均得分為13分並唔顯眼，但投射命中率幾近五成，就係佢個人近六季新高，成為熱火最重要嘅內線球員。
人棄我取成大器
不過，熱火今季最大發現係新秀查馬斯；佢喺選秀會僅以第三十四位被木狼揀中，輾轉交易到熱火之後，竟迅速成為球隊正選。查馬斯今季平均攻入10分及4.9個助攻，而1.95個偷波更排喺新秀榜第一位，仲勁過狀元爺戴歷羅斯，有佢加上「Ｊ奧」協助韋迪，熱火絕對係一路奇兵。