騎士食塞登基差一步

力爭常規賽冠軍嘅騎士，尋日又行前一步，球隊喺主場以107比76大勝東岸宿敵塞爾特人31分，只要今朝作客擊敗溜馬嘅話，就肯定獲得常規賽一哥寶座！

「綠衫軍」塞爾特人今場希望挫一挫對手銳氣，阻止騎士以大勇狀態打季後賽。可惜騎士開賽後已展示出強勁主場優勢，首節打出31比9嘅分數，大幅度領先22分，令缺少加納特嘅塞爾特人陷入苦戰。

湖人獵「熊」仲未斷氣

騎士三節過後拉開26分優勢，因此主力如勒邦占士等都唔使再上場，最終騎士贏107比76，歷史上與塞爾特人對戰173場比賽中，騎士贏得最多嘅一次。今場「大帝」攻入全場最高29分及7次助攻，當中三分球8射5中，手感極佳。

因湖人同日亦以92比75擊敗灰熊，所以騎士未能提前獲得常規賽冠軍，但只要今朝作客擊敗溜馬，就可以正式登上一哥寶座。雖然塞爾特人畀宿敵大炒，但球隊都唔係冇好消息嘅，皆因前鋒加納特已經傷愈，教練李華士亦表示會喺餘下兩場常規賽中畀佢復出，等佢回復狀態打好季後賽。