本文重點
每年嘅NBA季後賽前夕，總係有一啲球員時運低，喺呢個關鍵時刻受傷無緣季後賽。尋日魔術主將陶告魯就差啲畀易建聯K.O.，佢喺一次進攻時踩中阿聯隻腳扭傷左足踝，狀甚痛苦要即時抬離場！幸好檢驗之後證實未有傷及筋骨，但餘下常規賽唔使預佢。
魔術尋日作客去到新澤西，因賽前仲有機會爭東岸二哥，所以鬥志奇高，只係估唔到冇嘢好爭嘅籃網打出代表作，令魔術全場在劣勢下輸93:103，只能以東岸第三完成常規賽。
殘陣鬥公鹿難睇好
易建聯後備為籃網上陣25分鐘，雖然只攻入3分，但防守上交到貨，錄得7籃板2封阻及1偷波，但令人印象最深刻都係佢意外地被魔術射手陶告魯踩中但一啲事都冇，反而陶告魯就受傷倒地。由於魔術早前有尼爾遜因肩膀傷患收咧，加上劉易斯仲未傷愈，如果冇埋陶告魯，實力肯定大打折扣，幸好賽後證實佢傷勢唔嚴重，只係魔術聽朝對公鹿個陣勁殘，下盤要留意。
（周二早上8時開賽）