Hi！我係Matthew，係香港巴塞足球學校嘅後備前鋒，我哋今次出唔到線，真係好唔抵呀！
雖然我喺頭兩場分組賽大部分時間坐冷板，每場只係踢得五分鐘左右，但我都好專心咁睇隊友比賽。西班牙呢度啲球場真係比香港靚好多，不過對手水準唔算好勁，我哋應該有得贏添，可惜啲球證實在太差啦，我覺得佢偏幫番自己西班牙嘅球隊，咁樣對我哋真係好唔公平！
不過唔輸都輸咗，我哋惟有繼續努力啦。唔經唔覺，我哋嚟咗呢度都已經有一個禮拜，暫時印象最深刻嘅，就梗係入魯營睇歐聯啦！之不過現場氣氛雖然好熱烈，但如果有得畀我揀，就寧願喺屋企睇電視舒服啲啦，因為球場入面太多人食煙，周圍空氣好差，我仲見到有人食雪茄添，陣味真係好臭㗎！
廖智謙 9歲 陳瑞祺喇沙小學4年級 前鋒