山貓畀雷劈碎出線夢

山貓季後賽夢碎！今季表現大躍進嘅山貓，尋日作客以八十一比八十四不敵雷霆，因同日活塞以一○○比九十三擊敗籃網，結果東岸八個季後賽席位提早誕生，公牛、活塞搭上尾班車，而山貓則未能歷史性初戰季後賽。
  • 放大圖片

本以為去到冇嘢好爭嘅雷霆主場，山貓可以輕鬆過關，點知一眾球員出閘脫腳，開賽初段夢遊球場，結果首節已落後十七比廿七，縱然球隊下半場略有改善，但最終仍以三分不敵雷霆，自毀打入季後賽嘅長城。

活塞破網趕上尾車

相反競爭對手活塞就夠晒爭氣，面對籃網有六位球員攞得雙位得分數字，其中後備入替嘅韋爾拜林攻入全隊最高二十分，助活塞趕上尾班車。現時東、西岸十六個季後賽席位已誕生，餘下常規賽賽事只係名次之爭。