本文重點
騎士正式鎖定為東岸常規賽冠軍！今季愈戰愈勇嘅騎士，尋日憑「大帝」勒邦占士搶得「雙雙」，作客輕鬆以一○二比九十二擊敗76人，常規賽六十四勝十五負，肯定成為東岸冠軍。
周一凌晨惡鬥綠軍
月初經歷兩連敗後，騎士近期已搵番贏波節奏，今場擊敗76人後，球隊已取得三連勝。縱然作客，但騎士今場打得頗為輕鬆，全場領先之下，勒邦占士取得「雙雙」廿七分及十次助攻，而兩位射手莫威廉士及後備上陣嘅薩比亞，同樣貢獻十八分，成為贏波最大關鍵。
由於湖人於同日以九十八比一○六輸畀拓荒者，現時騎士已領先湖人一場半，只要在餘下三戰中贏多兩場，就肯定成為常規賽盟主。
不過騎士周一凌晨會遇上硬仗，就係主場東岸宿敵塞爾特人，雖然「綠軍」已失去東岸一哥之位，但佢哋仲要保住第二位出戰季後賽，所以今場絕對唔會放軟手腳。可惜騎士今季主場只輸過一場，要佢哋主場輸波真係難過登天。