政情：元朗721將近兩周年痛心依舊 何君堯籲年輕人浪子回頭

慨嘆受刀襲 祖墳被破壞

何君堯曾被指係前年721元朗事件嘅幕後主謀，帶領其他人去元朗作出挑釁行為，以及煽動他人參與集體毆鬥等。事件之後，多咗好多敵視何嘅人，其位於荃灣同埋屯門嘅議員辦事處，分別遭到刑事毀壞同縱火，就連雙親嘅祖墳都受到破壞。喺同年區議員換屆選舉期間，何於屯門湖翠路擺街站時，更遭假扮支持者嘅壯漢持利刀突襲，胸口被刺中受傷。

儘管事過境遷，但何仍然對過去事情感到痛心，指香港係一個開放同包容嘅社會，係言論自由嘅地方，大家可以各抒己見，意見表達上就算加多幾分肉緊亦都無妨，只要唔好訴諸暴力，四處破壞，又話好高興見到近日司法機構轄下嘅司法學院舉辦量刑工作坊。

何又指出，年輕唔係免死金牌，做錯唔緊要，但係要承擔責任，所以唔好做違法事情。何重申違法無法達義，只會喺監倉虛度歲月咁話。又話721無論對香港人及佢自己嚟講都係個教訓，估唔到政府投入咁多教育、醫療及社會福利資源，但年輕人竟被誤導，更估唔到自己議政參政但換來祖墳被破壞，真係天理不容。何話自己曾經講過，行差踏錯嘅年輕人，只要肯坦誠過失，自己一定會原諒，因為浪子回頭金不換呀，所以嚟到呢一刻，只要願意認錯的，佢仍然會歡迎咁話！

少年毀議辦 何稱已原諒

其實早前一名涉案朱姓少年承認刑事毀壞何地區辦事處，被判12個月感化令，惟律政司不服並覆核刑期，最終改判200小時社會服務令。何君堯就話收到少年嘅道歉信，接受對方道歉同埋原諒咗佢，仲話機會是給予真誠認錯嘅人。