政情：推長髮Look抗疫貼圖 何栢良：唔係扮陳肇始
新冠肺炎持續超過一年，雖然近日有緩和迹象，但市民防疫都唔可以鬆懈。港大感染及傳染病中心總監何栢良之前都有自製通訊媒體用到嘅貼圖，提醒市民要勤洗手、戴好口罩或多留在家等。何日前再推出新嘅打針貼圖，留意到其中一張貼圖係長髮Look，唔通佢扮緊食物及衞生局局長陳肇始？
借用《龍珠》概念鼓勵市民
我哋問過何栢良，佢話並唔係扮緊陳肇始，貼圖上嘅佢留長頭髮只係因為一個字「型」！貼圖內佢亦高舉有蛇嘅圖案，佢解釋銅蛇係醫學界嘅常用標誌，源自於《聖經》中摩西舉高銅蛇令百姓得到醫治。而佢喺貼圖入面所着嘅紅色衫設計原型來自經典動漫《龍珠》，佢話想借用《龍珠》中「努力」、「友情」同「戰鬥」等概念，鼓勵市民抗疫。
講番何栢良嘅新貼圖，其中一幅係一個護士幫佢打針，並附上「打針抗疫，最有效力」嘅標語。佢仲話貼圖上着嗰件T-shirt係旅行衫嚟，寫有外國地名，寓意接種完新冠疫苗有望通關去旅行呀！