中環出更：新年遇火警 陳志豪抱住仔行30幾層
新年流流當然講求好意頭，但香港廣西社團總會副會長陳志豪（Victor）就唔多好彩，居住嘅大廈喺前晚凌晨4點幾突然火燭喎！佢話大廈嘅火警鐘成日發生誤鳴，本身都想睇定啲。不過多得好鄰居撳門鐘，打開門先發現啲煙攻到上嚟，即刻嗌醒熟睡嘅太太同小朋友，囝囝見到消防員仲大嗌「火燭要救火啊！好驚燒死啊！」好彩大家都平安無事，只係Victor同太太抱住兩個小朋友行30幾層樓梯，雙腳有啲攰啫!
養育小朋友要花唔少心機同時間，Victor當然感同身受。佢嘅一對囝囝分別5歲同一歲大，佢話兩個仔初時都好黐佢，但當佢工作繁忙、要出差時，囝囝明顯會對佢比較陌生，甚至唔想畀佢抱。趁住農曆新年假期，Victor都花多啲時間陪伴囝囝，希望作彌補，同時仲可以容許太太有多啲自由時間，出街購物添!
余鵬春孫女瞓着都笑住
小朋友真係大得好快，香港中華總商會常務會董余鵬春（PC）嘅孫女，眨吓眼滿月嘞！卓妮前排喺社交網站見到佢哋慶祝滿月嘅相，雖然小孫女Korie喺好多張相都瞓緊覺，但仍然保持微笑，真係好可愛啊！聽PC講因為疫情關係，並無大宴親朋，只係同至親食飯慶祝。PC又話同囝囝一齊為小Korie改咗中文名，不過唔透露住。卓妮諗呢個名一定包含咗爺爺同爸爸嘅祝福啊。依家時興用小嬰兒嘅胎毛整胎毛筆留念，PC話佢無理咁多啊，做爺爺嘅負責氹吓孫女笑就滿足。
唔單止PC，已經退休嘅勞工及福利局前局長蕭偉強近排都升呢做爺爺。卓妮見佢喺社交網站都有貼出孫女滿月嘅相，仲笑孫女「趕得切出嚟（扌豆）利是囉」，喺大年初一嗰日嘅貼文仲話「我大一個月，大家添新歲！」卓妮