政情：擺街站冇戴口罩 鄭錦滿被市民質問
第4波新冠肺炎疫情仍然嚴峻，人人都要打起十二分精神抗疫。不過熱血公民鄭錦滿尋日晏晝喺荃灣站天橋開街站派工作報告期間竟然冇戴口罩，仲畀唔同政見光譜嘅市民質詢，但鄭就唔聽勸戴番個口罩，搞到市民最後要搵警察幫手添。
被鬧知法犯法 報警處理
鄭錦滿聲稱喺擺街站期間，有個戴住被認為係「黃店」出產嘅口罩嘅市民影佢相，同埋問佢做乜唔戴口罩。而旁邊有另一名女士見到亦加入質詢同起哄，呢位女士仲鬧鄭知法犯法，要報警拉佢。佢唔止冇驚過，仲好得戚咁擺定姿勢畀人影相，同埋話自己係「公民抗命」喎。嗰位女士最後真係有搵警察嚟處理，但當警察到場時，鄭已經派完傳單收緊站，仲好自豪咁話告佢唔到喎，又話因為冇戴口罩而「再次見證黃藍一家親」。
同屬熱血公民嘅議員鄭松泰亦有喺Facebook發帖話，遇到因防疫而篤灰嘅人真心淆底，仲話對方警民合作，又話「好彩我（鄭松泰）英明，減到一個月一次街站」喎。其實疫情嚴峻，唔戴口罩就梗係會畀人鬧啦，點解唔檢討吓自己，反而要批評質疑嘅人呢？