政情：無懼外國制裁 葉劉：最多咪唔去英美

自爆與英籍港人爭辯睇法

對於中央政府上星期宣布推出「港版國安法」，葉劉認為美國或者會擔心香港嘅高度自治受損，但未必可以依照上年通過嘅《香港人權與民主法案》制裁香港。佢解釋，根據上次交流，美國國會一位政策專家嘅講法，因為香港目前並無好似法案內容提到嘅非法移交、非法禁錮、酷刑，以及嚴重違反基本人權嘅情況出現，所以香港根本去唔到被制裁呢個地步。佢又話，由於「港版國安法」係中央政府制訂，而唔係特區政府官員話事，理論上香港嘅官員唔會受到制裁。

葉劉又自爆有個英籍香港居民成日寄電郵畀佢，內容主要都係話要制裁佢，其中講到葉劉透過眾籌，控告今年初發起罷工要求政府封關嘅前線醫護人員，但佢就堅持自己只係幫嗰啲受醫護罷工影響嘅病人，申請法援追討賠償，又反駁就算醫護有罷工權益，病人亦同樣有自身權利，遇到唔同意嘅講法一樣會喺電郵反駁對方。