政情：林琳出席聯合國會議 斥示威者威脅人權
最近唔少政黨都忙住外訪解釋香港事務，而青年發展委員會委員林琳最近都以中國聯合國協會理事身份，出席喺瑞士日內瓦舉行嘅聯合國會議，期間就講到香港人權問題，話過去九個月，香港人權受到嚴重威脅，需要正視。
指藉言論自由打壓異見者
林琳所講嘅係同反修例衝突有關，佢喺發言中提及，早前社會運動令香港變得冇人權，事件中好多人被「私了」，就好似舊年十一月喺馬鞍山有一名男士同政見唔同嘅人發生爭執，結果被人潑液體點火燒傷，仲講到唔少示威者用言論自由嚟做借口，打壓唔同意見人士，佢譴責嗰啲示威者完全係雙重標準。
舊年區選會選舉連任失敗，林琳笑言依家「失業」、好得閒，去參加呢個會議之餘，會順道玩吓，慶祝生日咁話！仲要係冇買回程機票(口架)，佢話可以同老公好好放鬆吓喎。不過，依家歐洲新冠肺炎疫情好嚴重，兩公婆只可以留喺瑞士玩啦！