政情：拆往立會天橋鐵絲網冇部門認頭
反修例風波中，天橋位置屢成示威者同警方嘅攻防點，所以政府近日喺多區天橋都安裝咗鐵絲網，但就有唔少區議員反對。中西區區議會交通及運輸委員會上周四開會傾拆除由中環中信大廈通往立法會大樓嗰條天橋嘅鐵絲網，但問到係邊個政府部門拍板裝鐵絲網時就「冇人認頭」，話要拆鐵絲網時更加「冇人反對」，搞到區議員都(搲)晒頭，究竟係邊個話裝鐵絲網呢？
議員擬提質詢施壓
中西區區議會交通及運輸委員會當日全票通過用小型工程撥款，話要拆除連接中信大廈嘅夏愨道天橋同近干諾道中山公園天橋嘅鐵絲網，事關佢哋都覺得鐵網醜化咗城市景觀同會影響防火安全。奇就奇在，出席嘅運輸署、路政署、消防處、建築署同屋宇署代表都否認有拍板，警方回覆就話係政府部門嘅集體決定，搞到過咗撥款都唔知搵邊個跟進。
投訴無門惟有靠自己，有議員透露會向立法會提出質詢施壓，要求涉事部門「現身」回應，而中西區區議會主席鄭麗琼話，會係嚟緊嘅地區工程及設施管理委員會繼續跟進，有冇進一步行動就要睇吓民政總署搵唔搵到負責嘅部門嘞！