政情：傳聞印度咖喱可防疫 李家仁：唔好人云亦云
早前有傳言話由武漢撤出嘅七百名印度人無一染病，係歸功於咖喱，但相信呢個傳言已被打破，事關印度都有病例，亦有港人去完印度旅遊之後確診染疫。
嗜食咖喱嘅兒歌醫生李家仁（小明）就對咖喱呢種奇效有所保留，又話另一項關於咖喱嘅傳聞，係指咖喱內含薑黃素，有助預防罹患老人癡呆，但佢認為需要得到印度方面嘅統計數據，比對該國嘅老人癡呆症患者係咪較其他地方大幅減少，先可支持呢種講法。到底咖喱係咪對身體有好處？佢都係以姑且聽之嘅態度嚟看待，總之保持獨立思考，唔好人云亦云咁話。
本來唔嗜辣 一食鍾情
講起食咖喱，小明話自己本來並唔嗜辣，但多年前光顧過診所附近某咖喱食肆，竟一食鍾情，自此每星期至少幫襯一次，佢亦試過去南亞國家品嘗當地嘅咖喱，雖各有風味，但佢始終覺得都係港人炮製嘅巴基斯坦咖喱最啱口味。