政情:易涉利益衝突 廢政府吸廢電池 周一嶽遲早爆鑊

政府無能又無才,日前又「翻閹」人稱「廢鑊」嘅前高官周一嶽(周一鑊)做醫務委員會委員,被各界炮轟做法離譜,質疑現時係保險公司顧問嘅周一鑊或有利益衝突,有學者更憂慮周一鑊偏向醫療保險一方,又批評特首林鄭月娥用人唯親,擔心再唔收回任命,會有更多過氣廢柴入局,令政府淪為官官相護嘅庸官俱樂部。

廢官入局 淪為庸官俱樂部

曾任食物及衞生局局長嘅周一鑊因表現拙劣「冇得留低」,喺任內八年一直懶理雙非同公立醫院人手不足問題,又屢爆傳染疫症同醫療失誤醜聞。點知政府突然又「翻閹」佢出任平等機會委員會主席,結果佢喺任內醜聞不絕,更令平機會被外界炮轟為「大花筒」。今屆港府「翻閹」再「翻閹」呢啲「舊電池」,委任佢做醫委會委員,擺明玩殘港人。

有醫委會委員日前話,保險公司通常都想壓低醫療費用定價,例如引入更多海外醫生令相關費用下降,因此擔心周一鑊嘅背景會影響對海外醫生嘅討論。話時話,當醫委會日後討論到相關項目,周一鑊就會因涉利益衝突,要經常避席,咁佢根本發揮唔到醫委會委員嘅功能,變得可有可無。

香港理工大學專業及持續教育學院講師陳偉強就話,周一鑊喺委員會可能偏幫醫療保險一方,或同保險公司有利益輸送,政府再唔收番周嘅任命,隨時喺醫務方面又「爆鑊」。時事評論員陳雲生亦話周一鑊唔係首次被「翻閹」,市民對佢嘅劣迹記憶猶新,又話一個稍有邏輯嘅政府都唔會畀民望政績都掃地嘅庸才重返官場,如果港府唔詳細解釋今次任命周嘅原因,就係有心玩殘港人。

唔少市民擔心無能政府用人無方,「舊電池」用開有條路,令庸官繼續為禍香港。正如同樣喺任內劣迹斑斑嘅仲有前特首曾蔭權爵士,佢曾被法庭裁定一項公職人員行為失當罪成,判監廿個月,佢其後向上訴庭上訴,但維持原判,刑期則改為十二個月。曾其後提出終極上訴,要求推翻其定罪,最後上訴得直,但佢當時已服刑完畢。

學者轟用人唯親 玩殘港人

其實啲「舊電池」多到排晒大隊,好似成日外訪唱衰香港、被內地官媒炮轟為「叛國禍港四人幫」嘅前政務司司長陳方安生(民主阿婆),明明佢已經冇晒人氣,但又不甘寂寞,對政府經常指指點點,唔知係咪好想畀人「翻閹」做公職,撈番個政治光環呢?仲有前房屋及規劃地政局局長孫明揚,喺任內為救樓市推出「孫九招」,反而為過去十多年土地同房屋歪曲發展種下禍根,如再任公職一定後患無窮。

陳偉強就話政府用人唯親,執意重用政績差、又同社會脫節嘅廢官,翻用「舊電池」,將法定或諮詢組織變成庸官俱樂部。

第一手消息請下載on.cc東網iPhone/iPad/Android/Windows Phone Apps